విజయం, లక్ష్యం, గమ్యం కోసం మన జీవన విధానం సరళం గా ఉంటే చాలు..., కఠినం గా కాదు.

జీవితం పట్ల ఆశావహ దృక్పధం కలిగి ఉన్న మానవునికి  ఎంతటి లక్ష్య మైన కఠినం గా ఉండదు.  అటువంటి దృక్పధాన్ని అలవరించేకుందుకు ఉపకరించే  సూత్రాలు మీ కోసం...

 
1. మీకు చేతనైన రీతిలో అభినందించడం ప్రారంభించండి.
...మీ ప్రశంసలు అందుకునే వాటిలో మనసుకు ఆహ్లాదం కలిగించే వాతావరణం, పార్కులో ఆడుకునే పిల్లలు, మీకు నచ్చిన భోజనంతో పాటు మీ సహచరుల, ఇతరుల గెలుపును... అభినందించండి... ఆస్వాదించండి. 

 
2. మిమ్మల్ని ఇతరులతో పోల్చుకోకండి.
...ఇతరులతో పోల్చుకుని, వారిని అందుకునే ప్రయత్నంలో మీరు  తపన, ఆరాటం, ఒత్తిడి కు లొంగనవసరం లేదు...

3. సందర్భాన్ని అనుసరించి స్పందించండి.
... సందర్భాన్ని అనుసరించి ఎలా స్పందించాలనే దానిపై నిర్ణయాధికారం మీదిగా చేసుకోండి.

4. మీ అంతట మీరుగా తెలుసుకోండి.
ఏదైనా విషయాన్ని మీ అంతట మీరుగా తెలుసుకోవడం లేదా నేర్చుకోవడం వలన ఆశావహ జీవితాన్ని గడపవచ్చు.

5. చర్యకు ప్రతిచర్య.
... మీకు నచ్చని వాతావరణంలో నచ్చినట్లుగా నటించకండి.

6. ప్రస్తుతంలో జీవించండి.
అవసరానికి మించి గతకాలపు మరియు భవిష్యత్తుకు చెందిన ఆలోచనలలో ఊగిసలాడకండి

7. మానసికంగా సిద్ధం కండి.
అరుదైన, గొప్పదైన సందర్భాలలో మీ భావవ్యక్తీకరణ, వ్యవహార శైలి, ఆత్మవిశ్వాసాన్ని ప్రదర్శించే తీరులో మీదైన శైలిని అలవరించుకుని చిరునవ్వును ఆభరణంగా ధరించండి.

8. అపజయాన్ని ఆహ్వానించండి.
గొప్పవారి జీవితాలలోకి అనేక అపజయాల తరువాతనే విజయం అడుగు పెట్టిందని గుర్తుంచుకోండి. పొందిన విజయంతో సంతృప్తి చెందక ఇతర అవకాశాల అందుకునే క్రమంలో అపజయాలు పునరావృతమైనా వారు వెనుకంజ వేయరు. కనుక మళ్ళీ మళ్ళీ ప్రయత్నించండి. విజయం మీ తలుపు తట్టక మానదు.

9. కోరుకున్న వాటిపై దృష్టిని కేంద్రీకరించండి.
నూతన వ్యక్తులతో సంబంధ బాంధవ్యాలను పెంపొందించుకునేందుకు అనేకమంది కొత్త వ్యక్తులను కలవడం ప్రారంభించండి. తద్వారా గొప్ప బాంధవ్యాలను ఏర్పరుచుకుని మీ జీవితంలో ఒంటరితనాన్ని పారద్రోలండి

10. ఇతరులకు సహాయం చేయండి.
ఇతరులకు సహాయం చేయడం ద్వారా అద్భుతమైన మానసిక అనుభూతిని సొంతం చేసుకోండి.

11. ఆలోచనలను నమోదు చేయండి.
ఆలోచనల చిట్టాను వ్రాయడం ప్రారంభించండి. ఆ చిట్టాలో అత్యధిక అంశాలు మీలో ఆశావహ దృక్పధాన్ని పెంచే వాటికి ప్రాధాన్యత ఇవ్వండి.తద్వారా మీ జీవితంలో నూతన అధ్యాయానికి శ్రీకారం చుట్టండి.

ఆఫీసు మీటింగ్ కు వెళ్ళాలా..., అయితే...

ఆఫీసు మీటింగులు ఎంతో ముఖ్యమైనవి. మీరు ఆఫీసు మీటింగులో ఈ క్రింద తెలిపినవి పాటిస్తున్నారా...,

• మీటింగులకు ఆలస్యంగా వెళ్లకండి. సమావేశానికి సంబంధించిన సమాచారాన్ని సిద్ధపరచుకోకుండా వెళ్లకండి. దానివల్ల అభాసుపాలవుతారు. ముందుగా మీ సీనియర్లను మాట్లాడనివ్వండి. వారు మాట్లాడుతున్నప్పుడు మధ్యలో జోక్యం చేసుకోకండి. మిమ్మల్ని ఏదైనా అడిగినప్పుడే నోరు మెదపండి.
•  ప్రశ్నిస్తున్నట్లుగా మాట్లాడకండి. దానివల్ల అనవసరపు వాగ్వాదాలు చెలరేగుతాయి. వక్రభాష్యాలు వద్దు. అవతలివారి మాటలను శ్రద్ధగా వినండి. అప్పుడు మీరు వారిని అపార్థం చేసుకునే ప్రమాదం ఉండదు. అలాగే మీరు మాట్లాడేటప్పుడు సందర్భోచితంగా, స్పష్టంగా, క్లుప్తంగా మాట్లాడండి.
•  భయకంపితులు కాకండి. దురదృష్టవశాత్తూ కొందరు ఉద్యోగులకు సమావేశాలకంటే రణక్షేత్రాలే. మీరు బాధితులైనట్లైతే మిమ్మల్ని మీరు కాపాడుకునే ప్రయత్నం చేయండి. అంతేగాని భయపడిపోకండి
•  సమావేశంలో చూయింగ్ గమ్ నములుతూ కూర్చోకండి. ఇది అవతలివారికి మీపట్ల ఏహ్యభావాన్ని కలిగిస్తుంది. అమర్యాదకరమైనది. సెల్‌ఫోన్‌ని స్విచాఫ్ చేయండి. సమావేశసమయంలో మీ సెల్ మోగుతున్నట్లయితే అది సమావేశానికి భంగం కలిగిస్తుంది. మాట్లాడటం అసలే కూడదు.
•  సమావేశపు ఎజెండాను హైజాక్ చేయకండి. మీరూ, మీ సహోద్యోగులు, ఉన్నతాధికారులు ప్రధానంగా ఏ విషయాలపై దృష్టి పెట్టాల్సి ఉందో అవి పక్కదోవ పట్టకుండా చూస్తుండండి. సమావేశానికి గైర్హాజరు కాకండి. ఇది చాలా హేయమైన చర్య అవుతుంది. మీపై అధికారులు దానిని సీరియస్‌గా తీసుకోవచ్చు కూడా.