ఆఫీసు మీటింగ్ కు వెళ్ళాలా..., అయితే...

ఆఫీసు మీటింగులు ఎంతో ముఖ్యమైనవి. మీరు ఆఫీసు మీటింగులో ఈ క్రింద తెలిపినవి పాటిస్తున్నారా...,

• మీటింగులకు ఆలస్యంగా వెళ్లకండి. సమావేశానికి సంబంధించిన సమాచారాన్ని సిద్ధపరచుకోకుండా వెళ్లకండి. దానివల్ల అభాసుపాలవుతారు. ముందుగా మీ సీనియర్లను మాట్లాడనివ్వండి. వారు మాట్లాడుతున్నప్పుడు మధ్యలో జోక్యం చేసుకోకండి. మిమ్మల్ని ఏదైనా అడిగినప్పుడే నోరు మెదపండి.
•  ప్రశ్నిస్తున్నట్లుగా మాట్లాడకండి. దానివల్ల అనవసరపు వాగ్వాదాలు చెలరేగుతాయి. వక్రభాష్యాలు వద్దు. అవతలివారి మాటలను శ్రద్ధగా వినండి. అప్పుడు మీరు వారిని అపార్థం చేసుకునే ప్రమాదం ఉండదు. అలాగే మీరు మాట్లాడేటప్పుడు సందర్భోచితంగా, స్పష్టంగా, క్లుప్తంగా మాట్లాడండి.
•  భయకంపితులు కాకండి. దురదృష్టవశాత్తూ కొందరు ఉద్యోగులకు సమావేశాలకంటే రణక్షేత్రాలే. మీరు బాధితులైనట్లైతే మిమ్మల్ని మీరు కాపాడుకునే ప్రయత్నం చేయండి. అంతేగాని భయపడిపోకండి
•  సమావేశంలో చూయింగ్ గమ్ నములుతూ కూర్చోకండి. ఇది అవతలివారికి మీపట్ల ఏహ్యభావాన్ని కలిగిస్తుంది. అమర్యాదకరమైనది. సెల్‌ఫోన్‌ని స్విచాఫ్ చేయండి. సమావేశసమయంలో మీ సెల్ మోగుతున్నట్లయితే అది సమావేశానికి భంగం కలిగిస్తుంది. మాట్లాడటం అసలే కూడదు.
•  సమావేశపు ఎజెండాను హైజాక్ చేయకండి. మీరూ, మీ సహోద్యోగులు, ఉన్నతాధికారులు ప్రధానంగా ఏ విషయాలపై దృష్టి పెట్టాల్సి ఉందో అవి పక్కదోవ పట్టకుండా చూస్తుండండి. సమావేశానికి గైర్హాజరు కాకండి. ఇది చాలా హేయమైన చర్య అవుతుంది. మీపై అధికారులు దానిని సీరియస్‌గా తీసుకోవచ్చు కూడా.

ఓవర్ టైం చేస్తున్నారా...అయితే !!

ప్రస్తుతం చాలామంది ఓవర్ టైం జాబ్ చేసి ఎక్కువ సంపాదించేందుకు ప్రణాళికలు రూపొందించుకుంటుంటారు. అధిక సమయం పనిచేసి ఆరోగ్యాన్ని పాడు చేసుకుంటుంటారు చాలామంది. కార్యాలయాల్లో సాధారణ పనివేళల్లో పనులు పూర్తి చేసి మిగిలిన సమయంలో విశ్రాంతి తీసుకుంటే ఆరోగ్యంగానే ఉంటారు.

కాని ప్రపంచంలోని దాదాపు 60 శాతంమంది ప్రజలు అదనపు పని వేళల్లో పనిచేసి గుండె సంబంధిత జబ్బులను కొని తెచ్చుకుంటున్నట్లు తమ పరిశోధనల్లో తేలిందని యూనివర్శిటీ కాలేజ్ లండన్, ఫిన్నిష్ ఇన్సిట్యూట్ ఆఫ్ ఆక్యుపేషనల్ హెల్త్ సంస్థలకు చెందిన పరిశోధకులకు నాయకత్వం వహించిన మరియన్నా విర్తానేన్ తెలిపారు.

తాము గత 11 సంవత్సరాలపాటు తాము 6,014 మందిని పరిశోధించినట్లు ఆమె తెలిపారు. తాము పరిశోధనలు ప్రారంభించిన సమయంలో (1990) వారి గుండెలు ఆరోగ్యంగానే ఉన్నాయి. పదకొండు సంవత్సారలపాటు పరిశోధించిన తర్వాత వీరిలో 369 మంది గుండె సంబంధిత జబ్బులతో మృతి చెందారు. మృతి చెందినవారు అధిక పనిభారాన్ని తట్టుకోలేక, మానసికపరమైన ఒత్తిడి కారణంగా గుండె జబ్బులతో మృతి చెందినట్లు తమ పరిశోధనల్లో తేలిందని ఆమె వివరించారు.

పనివేళల్లో పనిచేసి అదనంగా మరో నాలుగు గంటలపాటు ఓవర్ టైం పని చేసిన వారిలో అధిక బరువు, కొవ్వు శాతం పెరిగిపోయిందని, పైగా గుండె సంబంధిత జబ్బులున్నట్లు తాము కనుగొన్నామని ఆమె తెలిపారు. అదే ఓవర్ టైం పని చేయనివారిలో ఇలాంటి ఆరోగ్య సమస్యలు తలెత్తలేదని ఆమె చెప్పారు.

    

తమ ఆరోగ్యంపట్ల ప్రత్యేక శ్రద్ధ చూపేవారు ఓవర్ టైం చేయకుండా ఉండటమే ఎంతో మంచిదని ఆమె సూచించారు. ఇదిలావుంటే... ఓవర్ టైం చేయడం వలన మానసికపరమైన ఒత్తిడి, నిద్రలేమి తదితర జబ్బులు ప్రాథమిక దశలో తలెత్తుతాయి. దీంతో శరీరం సహకరించకపోవడం జరుగుతుంటుంది. వీటిని పరిగణనలోకి తీసుకోకపోతే అనారోగ్యంబారిన పడక తప్పదంటున్నారు పరిశోధకులు.